Մարոնի Եպիսկոպոսներու Խորհուրդը ողջունեց երկխօսութիւնը` մաղթելով, որ անոր նպատակը
ըլլայ նախագահական ընտրութիւնը
Մարոնի համայնքի Պշարա Ռայի պատրիարքը երէկ Պքերքէի մէջ նախագահեց Մարոնի եպիսկոպոսներու
խորհուրդի նիստին, որուն ընթացքին խստիւ դատապարտուեցաւ Լիպիոյ մէջ 21 ղպտի եգիպտացիներու
դէմ ՏԱՀԵՇ-ի գործած անմարդկային ոճիրը: Խորհուրդը ցաւակցութիւն յայտնեց անոնց հարազատներուն: Նիստէն
բխած հաղորդագրութեան մէջ նշուեցաւ, որ Մարոնի եպիսկոպոսներու խորհուրդը կոչ կ՛ուղղէ
Լիբանանի ճակատագիրը միջազգային կամ շրջանային իրադարձութիւններուն չկապելու` աւելցնելով,
որ անհրաժեշտ է ամրապնդել լիբանանեան ազգային միասնականութիւնն ու համախոհութիւնը` Լիբանանը
դուրս բերելու համար շրջանին դիմագրաւած հարցերէն ու տագնապներէն: Մարոնի եպիսկոպոսներու
խորհուրդը ողջունեց ապահովական աշխատանքը, որ կը կատարուի լիբանանեան բանակին եւ ապահովութեան
ուժերուն կողմէ, ինչպէս նաեւ դրուատեց լիբանանեան քաղաքական ուժերուն միջեւ ընթացող երկխօսութիւնը`
մաղթելով, որ անոր նպատակը ըլլայ նախագահական ընտրութիւնը: Խորհուրդը ցաւ յայտնեց,
որ Լիբանանի մէջ տակաւին կարելի չէ եղած հանրապետութեան նախագահ մը ընտրել: